# மாண்புமிகு அமைச்சர் ஆதவ் அர்ஜூனா அவர்கள் பிரம்மாண்ட திட்டங்களுக்காக பொதுப்பணி மற்றும் நெடுஞ்சாலை பொறியாளர்கள் கவனத்துடனும், துடிப்புடனும் பணியாற்ற அறிவுறுத்தல்

> மாண்புமிகு பொதுப்பணி மற்றும் விளையாட்டு மேம்பாட்டுத் துறை அமைச்சர் திரு.ஆதவ் அர்ஜுனா அவர்கள் தலைமையில் சென்னையில் நடைபெற்ற ஆய்வுக் கூட்டத்தில், பொதுப்பணி மற்றும் நெடுஞ்சாலைத் துறை பொறியாளர்கள் வரவிருக்கும் பிரம்மாண்டமான உள்கட்டமைப்பு திட்டங்களுக்கு தரம், காலக்கெடு மற்றும் வெளிப்படைத்தன்மையை உறுதி செய்யுமாறு அறிவுறுத்தினார், மேலும் சாலை பாதுகாப்பு மற்றும் நவீன கட்டிட வடிவமைப்புகளுக்கு முக்கியத்துவம் அளித்தார்.
- **Published**: 2026-09-22
- **URL**: https://news.nammamap.in/press-release/22579-minister-reviews-public-works-highways-projects-chennai

---

வரவிருக்கும் பிரம்மாண்டமான மற்றும் முக்கியமான திட்டங்களுக்காக பொதுப்பணி மற்றும் நெடுஞ்சாலைத் துறை பொறியாளர்கள் மிகுந்த கவனத்துடனும், துடிப்புடனும் பணியாற்ற வேண்டும்.

உட்கட்டமைப்புப் பணிகள் தரமாகவும், குறித்த காலத்திற்குள்ளும் பொதுமக்களுக்கு நேரடியாகப் பயனளிக்கும் வகையில் நிறைவேற்றப்பட வேண்டும்.

திட்டச் செயலாக்கத்தின் அனைத்து நிலைகளிலும் வெளிப்படைத்தன்மை மற்றும் பொறுப்புணர்வு உறுதி செய்யப்பட வேண்டும்.

ஒப்பந்த விதிமுறைகள், அரசாணைகள் மற்றும் நடைமுறைகள் முறையாகப் பின்பற்றப்பட வேண்டும்.

ஒப்பந்தங்கள் குறிப்பிட்ட காலக்கெடுவிற்குள் இறுதி செய்யப்பட வேண்டும்.

கட்டுமானப் பணிகளின் ஒவ்வொரு நிலையிலும் உரிய பொறியியல் தரநிலைகள் மற்றும் கட்டுமானப் பொருட்கள் மற்றும் பணிகளின் தரத்தை பொறியாளர்கள் உறுதி செய்ய வேண்டும்.

முக்கியப் பணிகளில் 3-ஆம் தரப்பு தரத்தணிக்கை மேற்கொண்டு, தணிக்கையில் சுட்டிக்காட்டப்படும் குறைபாடுகள் மீது உடனடி நடவடிக்கை எடுக்க வேண்டும்.

தற்போதுள்ள 2-3 தள கட்டிட வடிவமைப்புகளை மாற்றி, உலகத் தரத்தில் பன்னடுக்கு கட்டிட அமைப்புகளுக்கான கொள்கை வகுக்கப்பட வேண்டும்.

அரசு கட்டிடங்களை மாநிலம் முழுவதும் கள ஆய்வு செய்து, பராமரிப்பு மற்றும் சீரமைப்புத் தேவைகளுக்கான மதிப்பீடுகள் தயாரிக்கப்பட வேண்டும்.

கட்டிடங்களின் தற்போதைய நிலை, பராமரிப்புத் தேவை, மேற்கொள்ளப்பட வேண்டிய பணிகள் மற்றும் நிலுவைப் பணிகளை ஒருங்கிணைந்த டிஜிட்டல் டாஷ்போர்டில் பதிவு செய்து காலமுறை ஆய்வு மற்றும் பாதுகாப்பு தொடர்பான கண்காணிப்பு மேற்கொள்ளப்பட வேண்டும்.

மாநில நெடுஞ்சாலைகளில் வாகன எண் மற்றும் வேகத்தைக் கண்டறியும் ANPR மற்றும் செயற்கை நுண்ணறிவு அடிப்படையிலான கேமராக்களை நிறுவி, காவல்துறையின் e-challan அமைப்புடன் ஒருங்கிணைக்கப்பட வேண்டும்.

விபத்து அதிகம் நிகழும் பகுதிகளுக்கு முன்னுரிமை அளித்து பாதுகாப்பு நடவடிக்கைகள் மேற்கொள்ளப்பட வேண்டும்.

தேசிய நெடுஞ்சாலை ஆணையத்தில் உள்ளதைப் போன்று மாநில நெடுஞ்சாலைகளிலும் ரோந்துப் பணி மற்றும் அவசரகால மீட்பு நடவடிக்கைகளை செயல்படுத்த வேண்டும்.
---
- [All articles](https://news.nammamap.in/press-release)