விரிவான சுருக்கம்

சுதந்திரப் போராட்ட வீராங்கனை அஞ்சலை அம்மாள், கடலூர் முதுநகரில் அம்மாக்கண்ணு – முத்துமணி தம்பதியருக்கு மகளாக 1890-ல் பிறந்தார். ஐந்தாம் வகுப்பு வரை திண்ணைப் பள்ளியில் படித்த இவர், சிறுவயது முதல் சுதந்திரப்பற்றுடன் திகழ்ந்தார். 1921-ல் காந்தியடிகளின் ஒத்துழையாமை இயக்கத்தில் பங்கேற்று பொது வாழ்க்கையைத் தொடங்கினார். நீல் சிலை அகற்றும் போராட்டம், சட்டமறுப்பு மறியல் போராட்டம், தனிநபர் சத்தியாகிரகப் போராட்டம், அந்நியத்துணி புறக்கணிப்புப் போராட்டம், நெசவாளர்கள் போராட்டம் போன்ற பல போராட்டங்களில் ஈடுபட்டு சுமார் 6 ஆண்டுகள் சிறைத் தண்டனை அனுபவித்தார். கர்ப்பிணியாக வேலூர் சிறையில் அடைக்கப்பட்டிருந்த நிலையில், மகப்பேறுக்காக பரோலில் வெளிவந்து குழந்தை பெற்றபின் மீண்டும் சிறையில் அடைக்கப்பட்டார். நீல் சிலை அகற்றும் போராட்டத்தில் அவரது மகள் லீலாவதியையும் ஈடுபடுத்தியதால், மகளுக்கும் நான்கு ஆண்டுகள் சிறைத் தண்டனை விதிக்கப்பட்டது. தனது குடும்பச் சொத்துக்களையும், வீட்டையும் விற்று நாட்டிற்காகத் தியாகம் செய்தார். காந்தியடிகள் கடலூருக்கு வந்தபோது, அரசு தடையை மீறி பர்தா அணிந்து காந்தியடிகளை அழைத்துச் சென்றதால், அவர் 'தென்னாட்டின் ஜான்சி ராணி' எனப் பாராட்டப்பட்டார். 1937 மற்றும் 1946 ஆம் ஆண்டுகளில் கடலூர் தொகுதியிலிருந்து சென்னை மாகாண சட்டமன்ற உறுப்பினராக இருமுறை தேர்ந்தெடுக்கப்பட்டார். அவரது வாழ்நாள் முழுவதும் நாட்டின் நலனிற்காக தியாக வாழ்க்கை மேற்கொண்ட சுதந்திரப் போராட்ட வீராங்கனை அஞ்சலை அம்மாள் அவர்களின் வாழ்வு என்றென்றும் போற்றுதலுக்குரியதாகும்.