விரிவான சுருக்கம்

மாண்புமிகு தமிழ்நாடு முதலமைச்சர் திரு. ச.ஜோசப் விஜய் அவர்கள், பண்டிதர் அயோத்திதாசர் அவர்களின் 181-வது பிறந்த நாளை முன்னிட்டு இன்று (20.05.2026) காலை சென்னை, கிண்டி, காந்தி மண்டப வளாகத்தில் அமைந்துள்ள அன்னாரது திருவுருவச் சிலைக்கு மலர் தூவி மரியாதை செலுத்தினார்கள். பண்டிதர் அயோத்திதாசர் அவர்கள் 1845 ஆம் ஆண்டு மே 20 அன்று அன்றைய மெட்ராஸ் மாகாணத்தில் உள்ள தேனாம்பேட்டை ஆயிரம் விளக்கு பகுதியில் பிறந்தார். தனது ஆசிரியர் வல்லக்காலத்தி அயோத்திதாசர் பெயரையே தனக்குப் பெயராக மாற்றிக் கொண்டார். அவர் ஒரு சிறந்த எழுத்தாளர், ஆய்வாளர், வரலாற்றாசிரியர், பதிப்பாளர், மருத்துவர், பேச்சாளர், மொழியியல் வல்லுநர் மற்றும் பன்மொழிப் புலவர் ஆவார். ஏற்றத்தாழ்வு மிக்க சமூகங்களைக் கண்டு, சமூக சீர்திருத்தப் பாதையில் தனது பயணத்தைத் தொடங்கி சாதி ஒழிப்பையும், சமூக விடுதலையையும் தனது இலட்சியமாகக் கொண்டிருந்தார். சிறந்த சித்த மருத்துவராகவும் விளங்கினார். 1885-ல் ஜான் ரத்தினத்துடன் இணைந்து 'திராவிடப் பாண்டியன்' இதழையும், 1907-ஆம் ஆண்டு ஜுன் மாதம், 'ஒரு பைசாத் தமிழன்' என்ற இதழையும் தொடங்கினார். 1892-ல் நீலகிரி மாநாட்டுத் தீர்மானத்திலேயே இட ஒதுக்கீடு கோரிக்கையை முன்வைத்தார். ஒடுக்கப்பட்ட மக்களுக்கான பிரதிநிதித்துவ உரிமையையும் ஆணுக்கும், பெண்ணுக்கும் சட்டபூர்வமான சம உரிமை தேவையென வலியுறுத்தினார். கைம்பெண் மறுமணம், பெண்களுக்கு தொழிற்கல்வியில் இட ஒதுக்கீடு, சம உரிமை ஆகியவற்றைக் கோரிய காரணத்தால் இவர் 'தென்னிந்தியாவின் சமூக சீர்திருத்தங்களின் தந்தை' என்று அழைக்கப்பட்டார். பண்டிதர் அயோத்திதாசர் அவர்களின் பிறந்த நாள் ஆண்டுதோறும் தமிழ்நாடு அரசின் சார்பில் அரசு விழாவாக கொண்டாடப்பட்டு வருகிறது. இந்நிகழ்ச்சியில் பல மாண்புமிகு அமைச்சர்கள் மற்றும் உயர் அலுவலர்கள் கலந்து கொண்டனர்.