விரிவான சுருக்கம்

மாண்புமிகு முதலமைச்சர் திரு. ச. ஜோசப் விஜய் அவர்கள், 06.07.2026 அன்று நெம்மேலி மற்றும் பேரூரில் உள்ள நீர் உள்கட்டமைப்புகளை ஆய்வு செய்தார். சென்னை பெருநகர் குடிநீர் வழங்கல் மற்றும் கழிவுநீரகற்று வாரியத்தின் சார்பில், நெம்மேலியில் இயங்கிவரும் நாளொன்றுக்கு 110 மற்றும் 150 மில்லியன் லிட்டர் உற்பத்தித்திறன் கொண்ட கடல்நீரைக் குடிநீராக்கும் நிலையங்களின் செயல்பாடுகளையும், பேரூரில் ₹5814.57 கோடி மதிப்பீட்டில் அமைக்கப்பட்டுவரும் நாளொன்றுக்கு 400 மில்லியன் லிட்டர் உற்பத்தித்திறன் கொண்ட கடல்நீரைக் குடிநீராக்கும் நிலையத்தின் கட்டுமானப் பணிகளையும் பார்வையிட்டார். இந்த ஆய்வின்போது, கடல்நீரை உட்கொள்ளும் தொட்டி (Intake Sump), எதிர்மறை சவ்வூடு பரவல் நிலையத்தின் செயல்பாடுகள் (RO Building), SCADA செயல்பாடுகள், கடல்நீரை உட்கொள்ளும் கட்டமைப்பு (Intake Structure), லேமெல்லா தெளிவிப்பான் (Lamella Clarifier), வெளியேற்றும் தெளிந்த நீர்த்தொட்டி (RO Permeate Tank), நடுநிலைப்படுத்தும் தொட்டி (Neutralization Pit), நீர்சேகரிப்புத் தொட்டி (Product water tank), சுத்திகரிக்கப்பட்ட நீர்சேகரிப்புத் தொட்டி (Clear water reservoir), கசடுகளைக் கெட்டிப்படுத்தும் தொட்டி (Sludge Thickener), நிர்வாகக் கட்டடம் (Admin Building), பண்டகசாலை (Warehouse), சுண்ணாம்பு செறிவூட்டும் நிலையம் (Limestone Filter), எதிர்மறை சவ்வூடு பரவல் நீர்செலுத்தும் தொட்டி (RO Feed tank), எண்ணை மற்றும் கசடுகளை அகற்றும் தொட்டி (Dissolved Air Flotation), புவிஈர்ப்பு ஈரடுக்கு வடிகட்டி நிலையம் (Gravity Dual Media Filter), இரசாயனக் கட்டடம் (Chemical Building), மின்சாரக் கட்டடம் (Electrical Building) மற்றும் தொழிற்கூடங்கள் (Workshop) ஆகியவற்றின் கட்டுமானப் பணிகளை ஆய்வு செய்தார். கடல்சார் பணிகளில், 2500 மி.மீ. விட்டமுள்ள HDPE குழாய்கள் மூலம் 1200 மீ மற்றும் 1210 மீ நீளமுள்ள கடல்நீர் உட்கொள்ளும் குழாய்கள், 840 மீ நீளமுள்ள உவர்நீர் வெளியேற்றும் குழாய் பதிக்கும் பணிகள் நிறைவு செய்யப்பட்டுள்ளன. கடல்நீரை உட்கொள்ளும் கோபுரம் (Caisson) குழாய்களின் இறுதிப் பகுதியில் இணைக்கப்பட்டுள்ளது. இத்திட்டத்தின் குழாய்கள் பதிக்கும் பணிகளில், பேரூரிலிருந்து போரூர் வரை 59 கி.மீ. நீளத்திற்கு 2000/1800/1000 மி.மீ. விட்டமுள்ள குழாய்கள் பதிக்கும் பணிகள் நடைபெறுகின்றன. இதில், 41.51 கி.மீ. குழாய்கள் கொள்முதல் செய்யப்பட்டு, 12.36 கி.மீ. குழாய்கள் பதிக்கப்பட்டுள்ளன. ECR-லிருந்து கோவிலஞ்சேரி சந்திப்பு வரை உள்ள 27.1 கி.மீ. நீளத்திற்கு 2000 மி.மீ. விட்டமுள்ள குடிநீர்க் குழாய்களில் 7.74 கி.மீ. நீளத்திற்கு குழாய்கள் பதிக்கும் பணிகள் நிறைவு செய்யப்பட்டுள்ளன. இத்திட்டத்தின் மூலம் சென்னை பெருநகர மாநகராட்சி, தாம்பரம் மாநகராட்சி மற்றும் பெருநகர சென்னை மாநகராட்சிக்கு அருகாமையிலுள்ள 20 ஊராட்சிகள் ஆகிய பகுதிகளில் உள்ள 22.67 இலட்சம் மக்கள் பயனடைவார்கள். மாண்புமிகு முதலமைச்சர் அவர்கள், நெம்மேலியில் இயங்கிவரும் கடல்நீரைக் குடிநீராக்கும் நிலையங்களை சிறந்த முறையில் பராமரித்து, பொதுமக்களுக்குத் தட்டுப்பாடின்றி தொடர்ந்து குடிநீர் வழங்கவும், பேரூரில் புதிதாக அமைக்கப்பட்டுவரும் நிலையத்தின் கட்டுமானப் பணிகளை விரைந்து முடித்து, மக்கள் பயன்பாட்டிற்குக் கொண்டுவரவும் தேவையான நடவடிக்கைகளை மேற்கொள்ளுமாறு துறை அலுவலர்களுக்கு அறிவுறுத்தினார். இந்த ஆய்வின்போது, மனிதவள மேலாண்மைத் துறை அமைச்சர் திரு. த. சரத்குமார், சட்டமன்ற உறுப்பினர் திரு. பா. விஜயராஜ், நகராட்சி நிர்வாகம் மற்றும் குடிநீர் வழங்கல் துறை கூடுதல் தலைமைச் செயலாளர் திரு. ககன்தீப் சிங் பேடி இ.ஆ.ப., சென்னை பெருநகர் குடிநீர் வழங்கல் மற்றும் கழிவுநீரகற்று வாரியத்தின் மேலாண்மை இயக்குநர் திரு. த. ஆனந்த் இ.ஆ.ப., செங்கல்பட்டு மாவட்ட ஆட்சித் தலைவர் டாக்டர் எம். வீரப்பன் இ.ஆ.ப., சென்னை குடிநீர் வாரிய பொறியியல் இயக்குநர் திருமதி உ. பர்வீஸ் மற்றும் அரசு உயர் அலுவலர்கள் உடனிருந்தனர்.