விரிவான சுருக்கம்

மாண்புமிகு தமிழ்நாடு முதலமைச்சர் திரு. ச.ஜோசப் விஜய் அவர்கள் இன்று (31.7.2026) சென்னை, எழும்பூர் ராஜரத்தினம் விளையாட்டு அரங்கில் நடைபெற்ற பதக்கங்கள் வழங்கும் விழாவில், காவல், சிறைகள் மற்றும் சீர்திருத்தப் பணிகள், தீயணைப்பு மற்றும் மீட்புப் பணிகள் ஆகிய துறைகளில் சிறப்பாகப் பணியாற்றிய அதிகாரிகள்/ஆளிநர்களுக்கு 2023-ஆம் ஆண்டு முதல் 2026-ஆம் ஆண்டு வரையில் அறிவிக்கப்பட்ட இந்திய குடியரசுத் தலைவர் பதக்கங்கள், ஒன்றிய உள்துறை அமைச்சர் பதக்கங்கள் மற்றும் தமிழ்நாடு முதலமைச்சர் பதக்கங்களை வழங்கிச் சிறப்பித்தார். இந்திய குடியரசுத் தலைவரின் தகைசால் பணிக்கான காவல் பதக்கம், மெச்சத்தக்க பணிக்கான காவல் பதக்கம், ஒன்றிய உள்துறை அமைச்சரின் சிறந்த செயலாக்கத்திற்கான காவல் பதக்கம், அசாதாரண நுண்ணறிவுத் திறனுக்கான காவல் பதக்கம், சீர்மிகு புலனாய்வுக்கான காவல் பதக்கம், சிறந்த புலனாய்வுத் திறனுக்கான பதக்கம், தமிழ்நாடு முதலமைச்சரின் சமூக சேவைக்கான காவல் சிறப்புப் பணி பதக்கம், சீர்மிகு புலனாய்வுக்கான காவல் பதக்கம், சிறந்த காவல் நற்பணிக்கான காவல் பதக்கம் (அண்ணா பதக்கம்), மெச்சத்தகுந்த தொழில்நுட்பம் மற்றும் சிறப்புப் பணிக்கான பதக்கம், விரல்ரேகை அறிவியல் சீர்மிகு பணி பதக்கம், மெச்சத்தக்க நுண்ணறிவு மற்றும் சிறப்புச் செயலாக்கத்திற்கான காவல் பதக்கம் உள்ளிட்ட பல்வேறு பதக்கங்கள் வழங்கப்பட்டன. மொத்தம் 630 காவல் அதிகாரிகள் / ஆளிநர்களுக்கும், இதர துறையினருக்கும் பதக்கங்கள் வழங்கப்பட்டன. மேலும், 8 கோடியே 27 இலட்சம் ரூபாய் செலவில் கொள்முதல் செய்யப்பட்ட கடலோரப் பாதுகாப்புக் குழுமத்திற்கான புதிய 42 நான்கு சக்கர மற்றும் 96 இருசக்கர ரோந்து வாகனங்களின் சேவையினைக் கொடியசைத்துத் தொடங்கி வைத்தார். திருவள்ளூர் முதல் கன்னியாகுமரி வரையிலான 14 கடலோர மாவட்டங்களை உள்ளடக்கிய 1076 கி.மீ. நீளமுள்ள கடலோரப் பகுதியைப் பாதுகாக்கும் வகையிலும், கண்காணிப்பு மற்றும் ரோந்துப் பணிகளைச் சிறப்பாக மேற்கொள்ளவும், சட்டவிரோதச் செயல்களைத் தடுக்கவும் இந்த வாகனங்கள் பயன்படுத்தப்படும். இவ்விழாவில் மோப்பநாய் படையின் சாகச நிகழ்ச்சிகள், காவல்துறையினரின் அணிவகுப்பு மற்றும் இருசக்கர வாகன சாகச நிகழ்ச்சிகளும் நடைபெற்றன. சட்டப்பேரவைத் தலைவர் திரு.ஜே.சி.டி. பிரபாகர், அமைச்சர்கள், சட்டமன்ற உறுப்பினர்கள், தலைமைச் செயலாளர் முனைவர் மு. சாய்குமார், இ.ஆ.ப., உள், மதுவிலக்கு மற்றும் ஆயத்தீர்வைத் துறை கூடுதல் தலைமைச் செயலாளர் டாக்டர் க.மணிவாசன், இ.ஆ.ப., காவல்துறை தலைமை இயக்குநர் திரு. மகேஷ் குமார் அகர்வால், இ.கா.ப., மற்றும் அரசு உயர் அலுவலர்கள் கலந்து கொண்டனர்.