கால்நடை மருத்துவ அறிவியல் மற்றும் கால்நடை பராமரிப்பு (BVSc & AH) பட்டப்படிப்பிற்கான மாணவர் சேர்க்கையானது, மேல்நிலைப் பள்ளித் தேர்வு மதிப்பெண்களின் அடிப்படையில் அல்லது அந்தந்த மாநில அரசுகளால் தீர்மானிக்கப்படும் மாணவர் சேர்க்கை அளவுகோல்களின் அடிப்படையில் மட்டுமே நடைபெற வேண்டுமென வலியுறுத்தி மாண்புமிகு இந்தியப் பிரதமர் திரு. நரேந்திர மோடி அவர்களுக்கு மாண்புமிகு தமிழ்நாடு முதலமைச்சர் திரு. ச. ஜோசப் விஜய் அவர்கள் கடிதம்

விரிவான சுருக்கம்

மாண்புமிகு தமிழ்நாடு முதலமைச்சர் திரு. ச. ஜோசப் விஜய் அவர்கள், கால்நடை மருத்துவ அறிவியல் மற்றும் கால்நடை பராமரிப்பு (BVSc & AH) பட்டப்படிப்பிற்கான மாணவர் சேர்க்கை தொடர்பான மிக முக்கியமான பொருண்மை குறித்து மாண்புமிகு இந்தியப் பிரதமர் திரு. நரேந்திர மோடி அவர்களின் கவனத்திற்குக் கொண்டுவர விரும்புவதாகக் கடிதம் எழுதியுள்ளார். இந்திய கால்நடை மருத்துவ கவுன்சில் சட்டம், 1984-ன் விதிமுறைகளின்படி, அனைத்து கால்நடை மருத்துவக் கல்லூரிகளிலும் BVSc & AH பட்டப்படிப்பிற்கான மாணவர் சேர்க்கையானது பொது நுழைவுத் தேர்வின் அடிப்படையில் மையப்படுத்தப்பட்ட கலந்தாய்வு முறை மூலம் ஒதுக்கீடு செய்யப்பட வேண்டும் என பரிந்துரைத்துள்ளதோடு, மாற்று ஏற்பாடாக 2026-27 கல்வியாண்டு முதல் நீட் (NEET UG-2026) தேர்வின் தரவரிசைப் பட்டியலின் அடிப்படையில் மாணவர் சேர்க்கை நடைபெற வேண்டும் என மாநிலங்களுக்கு அறிவுறுத்தியுள்ளது. இந்த முன்மொழிவு தமிழ்நாடு மாநிலத்திற்குப் பல்வேறு கடுமையான பாதிப்புகளை ஏற்படுத்துவதாகவும் முதலமைச்சர் தெரிவித்துள்ளார். கால்நடை மருத்துவக் கல்வியானது தமிழகத்தின் வளர்ச்சிக்கான முன்னுரிமைகளில் ஒரு தனித்துவமான இடத்தைப் பெற்றுள்ளது என்றும், இது கால்நடை பராமரிப்பு, கால்நடைகளின் ஆரோக்கியம், பால்வள மேம்பாடு மற்றும் இலட்சக்கணக்கான கிராமப்புறக் குடும்பங்களின் வாழ்வாதாரத்தைப் பாதுகாப்பதற்கான அடித்தளம் என்றும் குறிப்பிட்டுள்ளார். தமிழ்நாடு, மேல்நிலைப் பள்ளித் தேர்வில் மாணவர்கள் பெறும் மதிப்பெண்களின் அடிப்படையிலேயே பல தசாப்தங்களாக தொழிற்கல்விப் படிப்புகளுக்கான சேர்க்கை முறையை பின்பற்றி வருகிறது. இந்த முறையானது திறமையான வல்லுநர்களை உருவாக்குவதோடு, கிராமப்புறங்கள், அரசுப் பள்ளிகள், பொருளாதாரத்தில் பின்தங்கிய பிரிவினர் மற்றும் சமூகரீதியாகப் பின்தங்கிய சமூகங்களைச் சேர்ந்த தகுதியான மாணவர்களுக்கு உயர்கல்வியைப் பெறுவதற்கான நியாயமான வாய்ப்பை உறுதிசெய்து, சமூக நீதி, பிராந்திய சமத்துவம் மற்றும் அனைவரையும் உள்ளடக்கிய வளர்ச்சிக்கான பயனுள்ள கருவியாகச் செயல்பட்டுள்ளது. 2007-2008 ஆம் கல்வியாண்டு முதல் தமிழ்நாடு அரசு தொழிற்கல்விப் படிப்புகளுக்கான பொது நுழைவுத் தேர்வை ரத்து செய்துள்ளது என்றும், நீட் உள்ளிட்ட ஒருங்கிணைந்த நுழைவுத் தேர்வுகள் கிராமப்புற மற்றும் பின்தங்கிய மாணவர்களுக்கு நுழைவு நிலையில் பெரும் தடைகளை ஏற்படுத்துகின்றன என்றும் மாநில அரசு தொடர்ந்து வலியுறுத்தி வருகிறது. தேசியத் தேர்வுகள் முகமை (NTA) நீட் தேர்வுகளை நடத்துவதில் பல்வேறு சிக்கல்களைச் சந்தித்து வருவதையும், 2024-ஆம் ஆண்டில் வினாத்தாள் கசிந்ததாகக் கூறப்பட்ட குற்றச்சாட்டுகள் மத்திய புலனாய்வுத் துறையின் விசாரணைக்கும் வழிவகுத்தன என்பதையும் கருத்தில்கொண்டு, கால்நடை மருத்துவப் படிப்புகளுக்கான சேர்க்கைக்கு நீட் தேர்வை அறிமுகப்படுத்துவது பொருத்தமானதாக இருக்காது என முதலமைச்சர் தெரிவித்துள்ளார். எனவே, இந்திய கால்நடை மருத்துவ கவுன்சில் தனது முடிவை மறுபரிசீலனை செய்ய அறிவுறுத்துமாறும், மேல்நிலைப் பள்ளித் தேர்வு மதிப்பெண்களின் அடிப்படையில் அல்லது அந்தந்த மாநில அரசுகளே மாணவர் சேர்க்கை அளவுகோல்களை தீர்மானிக்க அனுமதிக்க வேண்டுமென்றும், இது கூட்டாட்சி அமைப்பை மதிக்கும் என்றும், தகுதியான கால்நடை மருத்துவர்கள் உருவாவதை உறுதி செய்யும் என்றும் மாண்புமிகு இந்தியப் பிரதமர் அவர்களை மாண்புமிகு தமிழ்நாடு முதலமைச்சர் அவர்கள் தனது கடிதத்தில் கேட்டுக்கொண்டுள்ளார்.