தமிழ்நாடு நாள் விழா

விரிவான சுருக்கம்

முதலமைச்சர் திரு. ச. ஜோசப் விஜய் அவர்கள், மெட்ராஸ் மாநிலமாக உருவான நவம்பர் 1 மற்றும் 'தமிழ்நாடு' எனும் பெயர் சூட்டிய பேரறிஞர் அண்ணா அவர்களின் தீர்மானம் நிறைவேற்றப்பட்ட ஜூலை 18 ஆகிய இரு நாட்களும் தமிழ்நாடு நாளாக கொண்டாடப்படும் என அறிவித்தார். அதன்படி, நவம்பர் 1, 2026 அன்று சென்னை எழும்பூரில் உள்ள அரசு அருங்காட்சியகக் கலையரங்கில் தமிழ்நாடு நாள் விழா கொண்டாடப்பட்டது. இவ்விழாவிற்கு மாண்புமிகு ஊரக வளர்ச்சி மற்றும் நீர்வளத் துறை அமைச்சர் திரு. நா. ஆனந்த் தலைமை தாங்கினார். மாண்புமிகு பொதுப்பணி மற்றும் விளையாட்டு மேம்பாட்டுத் துறை அமைச்சர் திரு. ஆதவ் அர்ஜுனா, மாண்புமிகு பள்ளிக்கல்வி, தமிழ் வளர்ச்சி, செய்தி மற்றும் விளம்பரத் துறை அமைச்சர் திரு. ராஜ்மோகன், மாண்புமிகு சமூக நீதித் துறை அமைச்சர் திரு. வன்னி அரசு, மாண்புமிகு பால்வளத் துறை அமைச்சர் திருமதி சி. விஜயலட்சுமி ஆகியோர் முன்னிலையில் இவ்விழா நடைபெற்றது. தமிழ்நாட்டின் எல்லைகளை நிர்ணயம் செய்யப் போராடிய சிலம்புச் செல்வர் ம.பொ.சிவஞானம், தளபதி விநாயகம், மங்கலங்கிழார், மார்ஷல் நேசமணி, திருவாலங்காடு திருமலைப்பிள்ளை, திருத்தணி ரஷீத், பி.எஸ். மணி, சாம் நத்தாணியேல், தோழர் ஜீவா உள்ளிட்ட பலரது போராட்ட வரலாறுகள் நினைவுகூரப்பட்டன. வாழும் தமிழறிஞர் கவிஞர் கே. ஜீவபாரதி மற்றும் நினைவில் வாழும் தமிழறிஞர்களான பேராசிரியர் ராஜ் கௌதமன், திரு. சாரணபாஸ்கரன் (எ) டி.எம்.எம். அகமது, திரு. சா. கந்தசாமி, திரு. டி.எம். பீர் முகமது ஆகியோரின் நூல்கள் நாட்டுடைமையாக்கம் செய்யப்பட்டு, ஒவ்வொருவருக்கும் தலா ரூ.10 இலட்சம் நூலுரிமைத் தொகை வழங்கப்பட்டது. தமிழ்நாட்டின் எல்லைக்காக பாடுபட்ட 5 எல்லைக் காவலர்களுக்கு உதவித்தொகை ரூ.7,500/-லிருந்து ரூ.10,000/-ஆக உயர்த்தப்பட்டதற்கான அரசாணை வழங்கப்பட்டது. 2024 மற்றும் 2025 ஆம் ஆண்டிற்கான 76 தமிழ்ச்செம்மல் விருதாளர்களுக்கு ரூ.25,000/-ம் தகுதியுரையும், பொன்னாடையும் வழங்கப்பட்டது. 1330 திருக்குறளையும் முற்றோதல் செய்த 179 மாணாக்கர்களுக்கு ரூ.15,000/-ம் பாராட்டுச் சான்றிதழும் வழங்கப்பட்டது. சட்டமன்ற உறுப்பினர்கள் மற்றும் அரசு உயர் அலுவலர்கள் பலரும் இவ்விழாவில் கலந்து கொண்டனர்.