தாய்மாமன் தங்க மோதிரம் திட்டத்தை, மதுரை அரசு இராசாசி மருத்துவமனையில் மாண்புமிகு தமிழ்நாடு முதலமைச்சர் திரு. ச. ஜோசப் விஜய் அவர்கள் தொடங்கி வைத்தார்.

விரிவான சுருக்கம்

2026 செப்டம்பர் 28 அன்று, மாண்புமிகு தமிழ்நாடு முதலமைச்சர் திரு. ச. ஜோசப் விஜய் அவர்கள் மதுரை அரசு இராசாசி மருத்துவமனையில் 'தாய்மாமன் தங்க மோதிரம் திட்டம்' என்ற சிறப்புத் திட்டத்தைத் தொடங்கி வைத்தார். இத்திட்டம், அரசு மருத்துவமனைகளில் பிறக்கும் குழந்தைகளைச் சிறப்பிக்கும் வகையிலும், தமிழர் பண்பாடு மற்றும் கலாச்சாரத்தில் தாய்மாமன் ஏற்றுள்ள அன்பையும், அக்கறையையும் பிரதிபலிக்கும் வகையிலும் உருவாக்கப்பட்டுள்ளது. தமிழ்நாட்டில் தாய்-சேய் நலச் சேவைகளை வலுப்படுத்த அரசு வலுவான மருத்துவக் கட்டமைப்பு மற்றும் திறமையான மருத்துவப் பணியாளர்களின் மூலம் தொடர்ந்து செயல்பட்டு வருகிறது. கர்ப்பிணிப் பெண்களுக்கு நிதியுதவி, அவசரகால மகப்பேறு சிகிச்சை, ஊட்டச்சத்து ஆதரவு, மகப்பேறு தயார்நிலை, பயனாளிகளை டிஜிட்டல் முறையில் கண்காணித்தல், இலவச பிரசவம் மற்றும் பிறந்த குழந்தைப் பராமரிப்பு உள்ளிட்ட பல்வேறு திட்டங்கள் சிறப்பான முறையில் செயல்படுத்தப்பட்டு வருகின்றன. தமிழ்நாட்டில் ஆண்டுதோறும் சுமார் 7.80 இலட்சம் குழந்தைகள் பிறக்கின்றனர், அவற்றில் 4.20 இலட்சம் (53%) பிரசவங்கள் அரசு மருத்துவமனைகளில் நடைபெறுகின்றன. தேசிய குடும்ப நலக் கணக்கெடுப்பு -6 (National Family Health Survey-6) தரவின்படி, தமிழ்நாட்டில் 99.9% பிரசவங்கள் மருத்துவமனைகளில் நடைபெறுகின்றன. இவற்றில் 90% பிரசவங்கள் 130 அரசு மருத்துவமனைகளில் பிரத்தியேகமாக உருவாக்கப்பட்டுள்ள விரிவான அவசர கால மகப்பேறு மற்றும் பச்சிளங்குழந்தைகள் மையங்களில் (CEMONC) நிகழ்கிறது. இத்திட்டம் 2026 ஜூன் 22 அன்று முதல் நடைமுறைக்கு வந்துள்ளது, மேலும் இதற்கான அரசாணை 2026 ஜூன் 23 அன்று வெளியிடப்பட்டது. இத்திட்டத்தைச் செயல்படுத்த அரசு இந்த ஆண்டு 755.83 கோடி ரூபாய் நிதி ஒதுக்கீடு செய்துள்ளது. ஆண்டுதோறும் சுமார் 4.41 இலட்சம் குழந்தைகள் இத்திட்டத்தின் மூலம் பயன்பெறுவர் என எதிர்பார்க்கப்படுகிறது. ஒவ்வொரு தங்க மோதிரமும் தனித்துவமான வரிசை எண்ணுடன், சேதப்படுத்த முடியாத பாதுகாப்புப் பெட்டகத்தில் வழங்கப்படும். 2026 ஜூன் 22 முதல் 2026 செப்டம்பர் 27 வரை அரசு மருத்துவமனைகளில் பிறந்த சுமார் 1.07 இலட்சம் குழந்தைகளுக்கு (செங்கல்பட்டு மற்றும் திருப்பூர் மாவட்டங்கள் நீங்கலாக) தங்க மோதிரம் வழங்கும் பணி 102 சீமாங் மையங்கள் மூலம் தொடங்கப்பட்டுள்ளது. 2026 செப்டம்பர் 28 முதல், அரசு மருத்துவமனைகளில் பிறக்கும் குழந்தைகளுக்கு வீடு திரும்பும்போது அந்தந்த அரசு மருத்துவமனைகளில் தங்க மோதிரம் வழங்கப்படும். இத்திட்டம், அரசு மருத்துவமனைகளில் குழந்தை பிறக்கும் தருணத்தை மருத்துவப் பாதுகாப்புடன், அரசின் அன்பான வரவேற்பையும் குடும்பத்துடன் பகிர்ந்து கொள்ளும் சிறப்பான நினைவாக மாற்றும் நோக்கம் கொண்டது. இவ்விழாவில் மாண்புமிகு ஊரக வளர்ச்சி மற்றும் நீர்வளத் துறை அமைச்சர் திரு. ந. ஆனந்த், மாண்புமிகு மருத்துவம், மருத்துவக் கல்வி மற்றும் மக்கள் நல்வாழ்வுத் துறை அமைச்சர் டாக்டர் கோ.க. அருண்ராஜ், மாண்புமிகு எரிசக்தி மற்றும் சட்டத்துறை அமைச்சர் திரு. சி.டி.ஆர். நிர்மல் குமார், மாண்புமிகு உயர்கல்வித் துறை அமைச்சர் திரு. பெ. விஸ்வநாதன், நாடாளுமன்ற உறுப்பினர்கள் திரு.சு. வெங்கடேசன் மற்றும் திரு. U. மாணிக்கம் தாகூர், சட்டமன்ற உறுப்பினர்கள், தலைமைச் செயலாளர் முனைவர் மு. சாய்குமார், இ.ஆ.ப., மருத்துவம் மற்றும் மக்கள் நல்வாழ்வுத் துறை செயலாளர் மரு. தாரேஸ் அகமது, இ.ஆ.ப., மதுரை மாவட்ட ஆட்சித் தலைவர் திரு. நிஷாந்த் கிருஷ்ணா, இ.ஆ.ப. மற்றும் அரசு உயர் அலுவலர்கள் கலந்து கொண்டனர்.