ரூ.10.25 கோடி செலவில் நவீன முறையில் புதுப்பிக்கப்பட்ட மதுரை, காந்தி நினைவு அருங்காட்சியகம் மாண்புமிகு தமிழ்நாடு முதலமைச்சர் திரு.ச.ஜோசப் விஜய் அவர்கள் திறந்து வைத்தார்.

விரிவான சுருக்கம்

மதுரையிலுள்ள வரலாற்று முக்கியத்துவம் வாய்ந்த காந்தி நினைவு அருங்காட்சியகம் பல்வேறு காலகட்டங்களில் கட்டப்பட்ட கட்டமைப்பாகும். இக்கட்டடத்தின் மையப் பகுதி 17-ஆம் நூற்றாண்டில் இராணி மங்கம்மாள் அவர்களால் கட்டப்பட்டது. அதனைத் தொடர்ந்து, 1877-ஆம் ஆண்டில் ஆங்கிலேய காலனித்துவ காலத்தில் இக்கட்டடத்தின் தெற்குப் பகுதியும், 1955-ஆம் ஆண்டு ஒன்றிய அரசால் நூலகத் தொகுதியும் கட்டப்பட்டன. 1959-ஆம் ஆண்டு காந்தி நினைவு அருங்காட்சியகம் முன்னாள் இந்தியப் பிரதமர் ஜவஹர்லால் நேரு அவர்களால் பொதுமக்கள் பார்வைக்காகத் திறந்து வைக்கப்பட்டது. ரூ.10.25 கோடி செலவில் நவீன முறையில் புதுப்பிக்கப்பட்ட இந்த அருங்காட்சியகம், பாரம்பரியத் தன்மையை மாற்றாமல், சுண்ணாம்பு, கருப்பட்டி, கடுக்காய், சிறு செங்கற்கள் மற்றும் ஆற்று மணல் போன்ற பாரம்பரியப் பொருட்களைப் பயன்படுத்தி புதுப்பிக்கப்பட்டுள்ளது. மேலும், அனைத்து மெட்ராஸ் டெரஸ் மற்றும் வளைவு வடிவக் கூரைகளும் அவற்றின் பாரம்பரியத் தன்மை மாறாமல் புதுப்பிக்கப்பட்டுள்ளன. ஆரம்பத்தில், கலைப்பொருட்களைக் காட்சிப்படுத்துவதற்காக அருங்காட்சியகத்தில் பல தடுப்புகள் அமைக்கப்பட்டிருந்தன. அந்தத் தடுப்புகள் தற்போது அகற்றப்பட்டு, அவற்றுக்குப் பதிலாக டிஜிட்டல் மயமாக்கப்பட்ட காட்சிப் பெட்டிகள் பொருத்தப்பட்டுள்ளன. பழைய சேதமடைந்த கூரை உத்திரக்கட்டைகள், கதவுகள் மற்றும் ஜன்னல்களுக்குப் பதிலாக புதிய தேக்குமரக் கூரைச்சட்டங்களும், பலகைகளும் பொருத்தப்பட்டுள்ளன. பார்வையாளர்கள் பயன்பாட்டிற்காக, எட்டு நபர்கள் பயணிக்கக்கூடிய மின்தூக்கி, அதனுடன் இணைக்கும் நடைபாதை அமைக்கப்பட்டு புதிய கழிப்பறைக் கட்டடமும் கட்டப்பட்டுள்ளது. பிரதான நுழைவாயிலுக்கு அருகில் சிதிலமடைந்த நிலையில் இருந்த குமரப்பா குடில், தேவையான கட்டமைப்பு கிரில் வசதிகளோடு, புதிய துத்தநாகத் தகடு கூரையுடன் புதுப்பிக்கப்பட்டுள்ளது. திறந்தவெளி அரங்கின் தரை, கோட்டா கற்கள் பதிக்கப்பட்டு, சரிவுப்பாதையில் தேவையான கைப்பிடிகள் பொருத்தப்பட்டுள்ளன. இக்கட்டடத்தின் அழகியல் தோற்றத்தை மேம்படுத்தத் தேவையான மின்சாரப் பணிகளும் மேற்கொள்ளப்பட்டுள்ளன. மேலும் இந்த அருங்காட்சியகத்தில் டிஜிட்டல் மயமாக்கப்பட்ட காட்சி அமைப்பு, மகாத்மா காந்தியடிகள் பற்றிய தகவல்களைக் காட்டும் தொடுதிரைக் காட்சிகள், சுதந்திரப் போராட்ட வீரர்களின் படங்கள், மகாத்மா காந்தியடிகள் பயன்படுத்திய பொருட்கள், ரோட்டோஸ்கோப், ஒலி-ஒளிக் காட்சி அரங்கம், டிஜிட்டல் கியோஸ்க்குகள், பொம்மலாட்ட நிகழ்ச்சி ஆகியவை புதிதாக அமைக்கப்பட்டுள்ளன. அத்துடன், நூலகக் கட்டடத்தில் புதிய புத்தக அலமாரிகள் மற்றும் வாசிப்பு மேசைகள் அமைக்கப்பட்டுள்ளன. மாண்புமிகு தமிழ்நாடு முதலமைச்சர் அவர்கள் இன்று திறந்து வைத்து, அங்கு அமைக்கப்பட்டுள்ள டிஜிட்டல் மயமாக்கப்பட்ட காட்சி அமைப்பு, மகாத்மா காந்தியடிகள் பற்றிய தகவல்களைக் காட்டும் தொடுதிரைக் காட்சிகள், மகாத்மா காந்தியடிகள் பயன்படுத்திய பொருட்கள், மகாத்மா காந்தியடிகள் பற்றிய குறும்படம் உள்ளிட்டவற்றைப் பார்வையிட்டார். முன்னதாக, காந்தி நினைவு அருங்காட்சியக வளாகத்தில் உள்ள மகாத்மா காந்தியடிகளின் திருவுருவச் சிலைக்கு மாலை அணிவித்து மரியாதை செலுத்தினார்.