நுகர்வோர் கூட்டுறவு மொத்த விற்பனை பண்டகசாலைகளுக்கான கொள்முதல் நடைமுறையில் மேற்கொள்ளப்பட்ட சீர்திருத்தம் - "சந்தை" இணையவழி கொள்முதல் நடைமுறை - கூட்டுறவு விற்பனைச் சங்கங்கள், சுய உதவிக் குழுக்கள், உழவர் உற்பத்தியாளர் அமைப்புகள் இன்னும் விரிவான முறையில் பயன்படுத்திக் கொள்ள வேண்டுகோள்

விரிவான சுருக்கம்

நுகர்வோர் கூட்டுறவு மொத்த விற்பனை பண்டகசாலைகள் மற்றும் கூட்டுறவு நிறுவனங்களுக்குத் தேவையான நுகர்பொருட்கள், முன்னர் சென்னையில் செயல்பட்ட மத்திய கூட்டுக் கொள்முதல் குழு மற்றும் சென்னை, மதுரை, சேலம், ஈரோடு ஆகிய மண்டல கூட்டுக் கொள்முதல் குழுக்கள் மூலம் கொள்முதல் செய்யப்பட்டன. மாதம் சராசரியாக ரூ.8.00 கோடி மதிப்பிலான நுகர்பொருட்கள் கொள்முதல் செய்யப்பட்டன. இக்கொள்முதலில் 94 சதவீதம் தனியார் வர்த்தகர்களிடமிருந்தும், 6 சதவீதம் மட்டுமே கூட்டுறவு விற்பனை சங்கங்கள் மற்றும் பெரும் பல்நோக்கு கூட்டுறவு சங்கங்களிடமிருந்தும் மேற்கொள்ளப்பட்டது. மொத்த கொள்முதலில் 52 சதவீதம் மூன்று வர்த்தகர்களிடம் மட்டுமே குவிந்திருந்தது, இது தனியார் வர்த்தகர்களின் ஆதிக்கத்தைக் காட்டியது. மாண்புமிகு தமிழ்நாடு முதலமைச்சர் அவர்கள் தலைமையில் 02.07.2026 அன்று நடைபெற்ற "வெற்றி தமிழகம் தொலைநோக்குத் திட்டம்" ஆய்வுக் கூட்டத்தில், கூட்டுக் கொள்முதல் குழு முறையைக் கலைக்க அறிவுறுத்தப்பட்டது. சட்டமன்றப் பேரவையில் கூட்டுறவுத் துறை மானியக் கோரிக்கையின்போது, கூட்டுக் கொள்முதல் குழு நடைமுறை கலைக்கப்பட்டு, தமிழ்நாடு நுகர்வோர் கூட்டுறவு இணையத்தின் மேலாண்மையில் இணையவழி கொள்முதல் முறை அறிமுகப்படுத்தப்படும் என மாண்புமிகு கூட்டுறவுத்துறை அமைச்சர் அவர்களால் அறிவிக்கப்பட்டது. இடைக்கால ஏற்பாடாக, ஜூலை மற்றும் ஆகஸ்ட் 2026 மாதங்களில் கூட்டுக் கொள்முதல் குழு நடைமுறை திருத்தியமைக்கப்பட்டு, தனியார் வர்த்தகர்கள் முழுமையாகத் தவிர்க்கப்பட்டு, கூட்டுறவு அமைப்புகள், சுய உதவிக் குழுக்கள், உழவர் உற்பத்தியாளர் அமைப்புகள் மற்றும் அங்கீகரிக்கப்பட்ட உற்பத்தியாளர்களிடமிருந்து நேரடியாகக் கொள்முதல் மேற்கொள்ளப்பட்டது. தொடர்ந்து, கூட்டுறவு சங்கங்களின் பதிவாளர் அவர்களின் சுற்றறிக்கை எண்.15/2026, நாள் 03.09.2026 மூலம் வழிகாட்டு நெறிமுறைகள் வழங்கப்பட்டு, செப்டம்பர் 2026 முதல் "சந்தை" இணையவழி கொள்முதல் வலைதளம் மூலம் கொள்முதல் நடைபெற்று வருகிறது. இச்சீர்திருத்தத்தின் விளைவாக மாதாந்திர கொள்முதல் மதிப்பு தொடர்ந்து உயர்ந்துள்ளது. முந்தைய மாதச் சராசரியான ரூ.8.00 கோடியுடன் ஒப்பிடுகையில், ஜூலை 2026-இல் ரூ.9.47 கோடி (19.0 சதவீதம் உயர்வு), ஆகஸ்ட் 2026-இல் ரூ.16.45 கோடி (106.6 சதவீதம் உயர்வு) மதிப்பிலும், சந்தை வலைதளம் மூலம் செப்டம்பர் 2026-இல் ரூ.18.77 கோடி (135.8 சதவீதம் உயர்வு) மதிப்பிலும் கொள்முதல் மேற்கொள்ளப்பட்டுள்ளது. கடந்த மூன்று மாதங்களில் மட்டும் மாத சராசரி கொள்முதல் மதிப்பு ரூ.14.89 கோடி ஆகும். இம்மூன்று மாதங்களிலும் தனியார் வர்த்தகர்களிடமிருந்து எவ்விதக் கொள்முதலும் மேற்கொள்ளப்படவில்லை. செப்டம்பர் 2026-இல் மட்டும் 12.52 இலட்சம் கிலோ நுகர்பொருட்கள் சந்தை வலைதளம் மூலம் கொள்முதல் செய்யப்பட்டுள்ளன. கூட்டுறவு விற்பனை சங்கங்களின் பங்களிப்பு உயர்ந்துள்ளது. ஜூலை 2026-க்கு முன்னர் கூட்டுறவு சங்கங்களின் பங்களிப்பு மாதம் சராசரியாக சுமார் ரூ.0.45 கோடி அளவிலேயே இருந்த நிலையில், ஜூலை 2026 என்ற ஒரே மாதத்தில் கூட்டுறவு விற்பனை சங்கங்கள் மற்றும் நாஃபெட் மூலம் ரூ.5.89 கோடி மதிப்பிலும், ஆகஸ்ட் 2026-இல் ரூ.5.61 கோடி மதிப்பிலும் பொருட்கள் வழங்கப்பட்டுள்ளன. செப்டம்பர் 2026-இல் சந்தை வலைதளத்தில் பங்கேற்ற வழங்குநர்களில் சுமார் 64 சதவீதம் (14 சங்கங்கள்) கூட்டுறவு விற்பனை சங்கங்களாகும். கூட்டுறவு அமைப்புகள், உழவர் உற்பத்தியாளர் அமைப்புகள் மற்றும் சுய உதவிக் குழுக்களின் ஒருங்கிணைந்த பங்கு, முன்பு இருந்த 6 சதவீதத்திலிருந்து ஆகஸ்ட் 2026-இல் சுமார் 60 சதவீதமாகவும் உயர்ந்துள்ளது. சுய உதவிக் குழுக்கள் வழங்கிய பொருட்களின் மதிப்பு ஜூலை 2026-இல் ரூ.49.20 இலட்சத்திலிருந்து ஆகஸ்ட் 2026-இல் ரூ.167.10 இலட்சமாக மூன்று மடங்கிற்கும் மேலாகவும், உழவர் உற்பத்தியாளர் அமைப்புகள் வழங்கிய பொருட்களின் மதிப்பு ரூ.78.20 இலட்சத்திலிருந்து ரூ.221.20 இலட்சமாக உயர்ந்துள்ளது. அங்கீகரிக்கப்பட்ட உற்பத்தியாளர்களிடமிருந்து நேரடியாக மேற்கொள்ளப்பட்ட கொள்முதல் ரூ.2.02 கோடியிலிருந்து ரூ.6.62 கோடியாக உயர்ந்துள்ளது. சுய உதவிக் குழுக்கள் மற்றும் உழவர் உற்பத்தியாளர் அமைப்புகள் சந்தை வலைதளத்தில் சுயமாகப் பதிவு செய்து பங்கேற்கும் வகையில், 15.09.2026 அன்று மாநில அளவிலான பயிற்சியும், 16.09.2026 முதல் மாவட்ட ஆட்சியர்கள் மற்றும் மகளிர் திட்ட அலுவலர்களின் ஒருங்கிணைப்புடன் மாவட்ட அளவிலான தொடர் பயிற்சிகளும் வழங்கப்பட்டு வருகின்றன. பெரும் பல்நோக்கு கூட்டுறவு சங்கங்கள் ஜூலை 2026-இல் ரூ.29.40 இலட்சம் மற்றும் ஆகஸ்ட் 2026-இல் ரூ.33.60 இலட்சம் மதிப்பிலான பொருட்களை வழங்கியுள்ளன. இச்சங்கங்களின் பங்கேற்பை மேலும் ஊக்குவிக்கும் வகையில், அவை கொள்முதலுக்கு வழங்க முன்வரும் பொருட்களுக்கு, அச்சங்கங்கள் நிர்ணயம் செய்யும் விலையிலேயே கொள்முதல் செய்ய தற்போது நடவடிக்கை மேற்கொள்ளப்பட்டுள்ளது. இதன் மூலம் இச்சங்கங்களின் உறுப்பினர்களான மலைவாழ் மற்றும் பழங்குடியின மக்கள் உற்பத்தி செய்யும் பொருட்களுக்கு உறுதியான சந்தையும் உரிய விலையும் கிடைக்கும். சுய உதவிக்குழுக்கள் மற்றும் உழவர் உற்பத்தியாளர் அமைப்புகளின் பொருட்களுக்கு நிலையான மற்றும் நீடித்த சந்தை வாய்ப்பும், அவற்றின் உறுப்பினர்களுக்கு வேலைவாய்ப்பும், விவசாயிகளுக்கு நியாயமான விலையும் உறுதி செய்யப்பட்டுள்ளன. பதிவு தொடர்பான சந்தேகங்களுக்கு பிரத்தியேக கைப்பேசி எண் 8838034739 வழங்கப்பட்டுள்ளது. புதிய கொள்முதல் நடைமுறையின் மூலம் கொள்முதல் நடவடிக்கைகள் வெளிப்படைத்தன்மையுடனும் போட்டித்தன்மையுடனும் முறையான கண்காணிப்பின் கீழ் மேற்கொள்ளப்படுகின்றன. இடைத்தரகர்கள் இன்றி தரமான பொருட்கள் நியாயமான விலையில் கிடைப்பதால், நுகர்வோர் கூட்டுறவு மொத்த விற்பனை பண்டகசாலைகள் இலாபகரமாக இயங்குவதற்கும், கூட்டுறவு சங்கங்களின் வணிகப் பங்களிப்பு அதிகரிப்பதற்கும் வழிவகை ஏற்பட்டுள்ளது. இவ்வகையில், இக்கொள்முதல் சீர்திருத்தம் கூட்டுறவுத் துறையில் ஒரு முக்கியமான மற்றும் பயனுள்ள நிர்வாக நடவடிக்கையாக அமைந்துள்ளது.